Kvennakór Suðurnesja er gestgjafi landsmóts íslenskra kvennakóra í Reykjanesbæ 2026. Kórinn er elsti starfandi kvennakór á landinu en hann var stofnaður 22. febrúar árið 1968 og nálgast því sextugsaldurinn. Þetta er annað mótið sem kórinn heldur, en hann var gestgjafi landsmóts kvennakóra í Reykjanesbæ árið 2002 þar sem hátt í 400 konur úr 14 kórum víðsvegar að af landinu mættu.

Kórinn hefur ferðast mikið bæði innanlands og erlendis. Kórkonur hafa farið þrisvar til Cork á Írlandi og tekið þátt í alþjóðlegri kórakeppni, en fyrsta ferðin var 1967, áður en kórinn var formlega stofnaður. Næst fór kórinn til Írlands árið 1974 og í þriðja sinn árið 2000. Einnig var farið til Kanada og Bandaríkjanna árið 1977 og árið 2004 til Ungverjalands. Kórinn tók þátt í alþjóðlegri kórakeppni í Riva del Garda á Ítalíu árið 2007 þar sem kórinn vann til verðlauna í gullflokki. Kórinn fór til Minneapolis í Bandaríkjunum árið 2014 og á afmælisárinu 2018 heimsótti kórinn Færeyjar og tók þátt í kóramóti þar. Síðast tók kórinn þátt í alþjóðlegri kórakeppni í Kalamata á Grikklandi í október 2024. Kórinn hefur einnig ferðast mikið innanlands og haldið tónleika víða á landinu.

Kórinn heldur tvenna til þrenna tónleika á Suðurnesjum ár hvert, tekur þátt í samstarfi við aðra kóra og syngur á ýmsum menningarviðburðum á svæðinu, t.d. Ljósanótt og Þrettándagleði.

Stjórnandi kórsins er Dagný Þ. Jónsdóttir og meðleikari á píanó er Geirþrúður Fanney Bogadóttir.