Kvennakór Akurueyrar er stofnaður vorið 2001 upp úr blönduðum kór sem var og hét KA-kórinn. Þegar sá kór lognaðist út af, stóðu eftir 16 konur sem auglýstu eftir fleiri konum. Þetta gaf góða raun og fjölgaði ört í kórnum á næstu mánuðum og voru 116 konur í kórnum þegar mest var. Nokkrir stjórnendur hafa komið að kórnum;

Björn Leifsson 2001-2003
Þórhildur Örvars 2003-2005
Arnór H. Vilbergsson 2005-2008
Jaan Alavere 2008-2009
Daníel Þorsteinsson 2009-2016
Sólveig Anna Aradóttir 2016-2017
Sigrún Magna Þórsteinsdóttir 2017-2019
Valmar Väljaots 2019-2026

Sú hefð hefur skapast að Kvennakór Akureyrar tekur mæðradaginn yfir í Akureyrarkirkju. Þá syngur kórinn í messu um morguninn og eftir hádegi heldur hann vortónleika og er kaffihlaðborð innifalið í aðgöngumiðanum.

Það er stefna kórsins að flytja fjölbreytta og metnaðarfulla dagskrá af íslenskum og erlendum lögum. Í kringum jólin hefur kórinn sungið fyrir heimilisfólk á dvalarheimilum í bænum og einnig hefur hann sungið á Glerártorgi og í Lystigarðinum.

Kórinn hefur farið í margar utanlandsferðir, sérstaklega til Evrópu og síðast var farið í viku ferð til Skotlands vorið 2024. Voru haldnir þrennir tónleikar í þeirri ferð ásamt því að skoða það sem Skotland hefur upp á að bjóða. Kórinn fór til Kanada vorið 2012 og heimsótti Íslendingabyggðir í námunda við Winnipeg og Gimli. Þar tók kórinn þátt í Íslendingadeginum.

Nú með vorinu mun kórinn taka þátt í Landsmóti íslenskra kvennakóra sem haldið verður í Reykjanesbæ og er mikill spenningur á meðal kvenna, enda fátt skemmtilegra og magnaðra en að standa á sviði með öllum þessum konum og þenja lungun.