Kvennakór Hornafjarðar er skapandi og virkur kór sem hefur staðið fyrir mörgum minnisstæðum tónleikum og verkefnum í 29 ár bæði innan- sem utanlands. Áður en formlegur kvennakór var stofnaður var starfræktur leikfélagskór í eitt ár. Aðeins einn karlmaður var í kórnum og var því ákveðið að henda honum út og stofna Kvennakór Hornafjarðar. Kórinn hefur haft fimm stjórnendur en núverandi kórstjóri, Heiðar Sigurðsson, hefur sinnt starfinu lengst allra með miklum glæsibrag.

Kórinn leggur mikla áherslu á samveru og tónlistargleði. Undir stjórn kórstjóra okkar syngjum við lög sem ná yfir ýmsar tónlistarstefnur. Það gerir kórinn fjölbreyttan eins og meðlimir hans eru og gerir starfsemi okkar enn meira skapandi og skemmtilega. Kvennakór Hornafjarðar tekur ýmis verkefni að sér má þar nefna erlenda sjónvarpsþætti, Októberfest, Þjóðarkvöld, Caroling, syngja í öllum félagsheimilum og kirkjum í sýslunni okkar. Eitt árið söng kórinn á öllum einbreiðum brúm sýslunnar til að beina sjónum að samgöngumálum. Brúarsöngurinn fékk mikla umfjöllun og náði einnig eyrum þáverandi samgönguráðherra. Kórinn er með þriggja ára rúllu þar sem skipst er á að fara í utanlandsferð, ferð innanlands og svo á kvennakóramót þriðja árið þar sem við erum núna.

Söngurinn göfgar og glæðir!