Kvennakórinn Senjórítur var stofnaður sem deild innan Kvennakórs Reykjavíkur árið 1995. Tilgangurinn var að gefa áhugasömum eldri konum tækifæri til að halda áfram að syngja eftir sextugt. Stofnfélagar voru 18, en nú eru kórfélagar um 70 og kórinn löngu orðinn sjálfstæður.

Kórinn æfir einu sinni í viku yfir vetrartímann, heldur eina tónleika á ári og hefur sungið jólalög á aðventunni í samfélagshúsinu Vitatorgi. Þá fer kórinn í eitt ferðalag á hverju ári og einnig í æfingabúðir árlega. Undanfarið ár hefur kórinn tekið þátt í sýningu Borgarleikhússins “Laddi”, tvær kórkonur að jafnaði sungið og leikið á hverri sýningu. Síðastliðið vor söng kórinn lag á tónleikum Rottweiler hundanna í Laugardalshöll og einnig hefur kórinn sungið í kirkjum og víðar.

Árið 2016 fór kórinn í tónleikaferð til Færeyja, það var fyrsta utanlandsferð kórsins og tókst hún með ágætum. Þá fór kórinn haustið 2024 á stórt alþjóðlegt kóramót í Derry á Norður-Írlandi. Senjóríturnar hafa tekið þátt í landsmótum kvennakóra nokkrum sinnum, síðast vorið 2023.

Í nóvember á liðnu ári hélt kórinn upp á 30 ára afmæli með veglegum tónleikum í Langholtskirkju.

Stjórnandi kórsins er Ágota Joó.