Kvennakór Reykjavíkur hóf starfsemi sína árið 1993 og hefur því starfað í ríflega 30 ár. Frá árinu 2010 hefur kórinn sungið undir stjórn Ágotu Joó. Ágota er frá Ungverjalandi og hefur kórinn notið þess að kynnast ungverskri söngmenningu undir hennar stjórn.

Tónlistarval kórsins er sérlega fjölbreytt og krefjandi og leggur stjórnandi kórsins metnað sinn í að kynna kórkonum ólíka strauma í tónlist. Kórinn syngur á fjölda tungumála og er frumbyggjamál frá Afríku, japanska, ungverska og finnska dæmi þar um. Kórinn heldur tvenna tónleika á ári hverju auk þess sem hann hefur tekið þátt í kórakeppnum og kóramótum víða um Evrópu. Kórinn náði glæsilegum árangri í alþjóðlegri kórakeppni á Spáni árið 2016 og haustið 2017 tók kórinn þátt í sjónvarpsþáttunum Kórar Íslands. Var það lærdómsríkt og skemmtilegt ævintýri. Þó verðlaunasætið hafi ekki fallið kórnum í hlut viljum við trúa því að með þátttöku Kvennakórs Reykjavíkur og fleiri frábærra kvennakóra í þessum þáttum hafi kvennakórar almennt hlotið löngu verðskuldaða athygli. Í október á síðasta ári tók kórinn þátt í kóramóti í Króatíu og gat þar af sér gott orð fyrir fágaða framkomu og frumleika í lagavali en einkenni kórsins er einmitt að flytja fjölbreytta tónlist, bæði án undirleiks og með. Kórinn er nú orðinn þekktur fyrir líflega framkomu og hreyfingar og er stjórnandi kórsins óhrædd við að feta nýjar slóðir og prófa nýja hluti með kórnum. Til leiks á landsmót 2026 mæta rúmlega 30 konur og hlökkum við til að njóta þess með söngsystrum af landinu öllu.