Ágota Joó er fædd í Ungverjalandi og útskrifaðist frá Franz Liszt Tónlistarháskólanum í Szeged árið 1988 sem píanókennari, tónfræðakennari og kórstjóri. Hún hefur starfað með kórum um árabil og er þekkt fyrir metnaðarfulla og skapandi nálgun í kórstarfi.

Ágota tók við Kvennakór Reykjavíkur árið 2010 og undir hennar stjórn hefur kórinn tekið þátt í fjölmörgum tónleikum, kórakeppnum og kórviðburðum með góðum árangri. Hún hefur jafnframt stjórnað Senjórítukórnum í tvo áratugi og er kórstjóri Kórs Átthagafélags Strandamanna. Fyrsti kvennakórinn sem hún stjórnaði á Íslandi var Kvennakór Suðurnesja, og það er henni sérstök ánægja og heiður að fá að starfa með kórnum á ný.

Ágota er einn af stofnendum Tónskólans Do Re Mi þar sem hún starfar nú sem aðstoðarskólastjóri og píanókennari. Í starfi sínu leggur hún áherslu á fjölbreytta efnisskrá, nýsköpun og listrænan metnað og vinnur markvisst að því að efla kórmenningu á Íslandi.